يا باب يا مقفول ...امتى الدخول

صبرت ياما واللي يصبر ينول

دقيت سنين... والرد يرجع لي: مين ؟

لو كنت عارف مين

انا كنت أقول

عجبــــي !!!

يا عندليب ما تخافش من غنوتك

قول شكوتك واحكي على بلوتك

الغنوة مش ح تموتك

إنمــــا

كتم الغنا هو اللي ح يموتك

عجبي !!

نظرت فوق للنجوم وانا ساير

رجليا عترت في الحفر والحجاير

بقيت اقول وانا ع التراب : يا سلام

مش بس عبرة اخدت لكن عباير

عجبــــــي

جالك اوان ووقفت موقف وجود

يا تجود بده يا قلبي ...يابده تجود

ماحد يقدر يبقى على كل شئ

مع إن - عجبي - كل شــــئ موجود

عجبـــــي

أوصيـــــــك يا ابني بالقمــــــر والزهــــــــــــور

اوصيـــــــك بالليـــــــــل القاهـــــــــرة المسحــــــــور

وإن جيت في بالك ...اشتــــــرى عقد فل

لأي سمــــــرا ....وقبـــــــري اوعك تزور

عجبــــــي

يأســــك وصبـــــرك بين إيديك وانت حـــــــر

تيأس ..ما تيأس ...الحيـــــــاه راح تمر

أنا دقت من دا ومن دا .... عجبي ...لقيت

الصبــــــر مـــــر وبرضــــــك اليـــــأس مــــــر

عجبـــــي

رباعيــــات صلاح جاهـــين

خرج ابن آدم من العدم قلت : ياه
رجع ابن آدم للعدم قلت : ياه
تراب بيحيا ... وحي بيصير تراب
الأصل هو الموت و الا الحياه ؟

!عجبي

ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن

! عجبي

ياما صادفت صحاب و ما صاحبتهمش
و كاسات خمور و شراب و ما شربتهمش
أندم علي الفرص اللي انا سبتهم
و الا علي الفرص اللي ما سبتهمش

! عجبي

و الكون ده كيف موجود من غير حدود
و فيه عقارب ليه و تعابين ودود
عالم مجرب فات و قال سلامات
ده ياما فيه سؤالات من غير ردود

! عجبي

أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام

! عجبي

يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول

! عجبي